get strong or die trying

28Jan2015

Hallo Leute, Nachdem grod 3 h Pause zwischen zwei Föreläsning sand, gibts an kurzen Beitrag von uns.

As erstes mecht ma se oba gern bei olle Stars und Sternchen bedanken de uns mit originellen Kommentaren immer wieder a lächeln in Gesicht und Herzen zaubern. Do fühlt ma se glei goa nimma so weit weg von dahoam, wo da Humor und da Sarkasmus nu hand in hand spazieren gengan und se ned gegenseitig verwirrt in de Augn schaun, ois ob ma vielleicht doch ned gonz sauba in da marün warat.

Für olle de glaubn wir hom do herobn nur Gaudi, eich sog i glei amoi, dasst mim Peda imma, egal wost hinfoahst, aufn direktn Weg ins Trainingsloga bist. Do host normal an Krompf im Oberschenkl und a Zerrung in de Wadln direkt mitbucht. Für olle de Wissn, dass ma meistens imma a bissi übertrein ah, a kloane Tour durch so an Nochmittog bei uns:

Nochdems jetzt gseng hobts wie intensiv bei uns am Bizeps goabeit wird, head se des viellleicht goa nimma so unrealsitisch oh, dass da Amo heid in da Fruah beim Radlweg in d Uni (15km) glei auf de ersten 200m sei Balanz vom Radl ausgrissn hod. Man konn jetzt sogn: Guad, des woa oba a a billigs Radl, des konn do scho amoi passiern. Oba donn kinnts ma amoi erklärn warum des beim Peda ned passiert is? Do muast scho a brutale Kroft hom, normalerweise. Wos duast in dem Foi ois Team, wonn oana sei Radl aus versehen ausanondbaut hod? Genau, oana foaht weida in d Uni und da ondere schiabt hoam in d Jagahittneigene Werkstott, wo unter Funkenflug und  Staubwolken mit Homma, Flex, Betonmischer und Bagger (so hods a se zumindes ogfühlt) der Imbusschraufn mit ca. 250Nm wieder ozzogn woan is. Gottseidonk is jetzt der, der eigentlich eh mit am guadn Orientierungssinn ausgstottet is mit da Koatn und da GPS Uhr wsl scho long in da UNI, während da ondere noch 5km Radlweg scho vor da highlightaufgob des Tages steht: soid i do jetzt links oder doch liaba eher rechts? rechts probiert...natürlich foisch. Zruck zur Kreizung stehst vor da zweiten großen Frage innerhoib 2 Minuten.. von wo bist jetzt eigentlich kema?

Schlussendlich sama oba donn doch nu beide in da Übung gsessn und hom se exercise 2 ogschaut.

Für olle des immer nu ned begriffen hom, dass in Schweden genau so vü blonde, große, schlonke und unglaublich brutal wunderschene Frauen umadumlaufn wie großbusade Österreicherinnen im Dirndlkleidll kurz noch Silvester am Spittlberg zum Raketnglaum, genau für de homma donn doch nu a boa Nahaufnahmen gmocht:

De Person in der rechten Bildhälfte woit unerkannt bleibn!

Wie ma vorallem in dem Bild sche siagt: So schoaf san de echt ned. Des Foto is mit ana 13 megaPixl kamera erstellt wordn - des sogt scho amoi ois.

Oba wir wartn ned wir, wonn ma ned weida suachn datn und ned aufhean bis ma eich ned doch irgendwonn de perfekte Frau vor d Linsn hoin. Moang foah ma glei moi zum IKEA und schaun se um a schwoaze Couch um.

In dem Sinne

so schiach sand de leid dahoam doch goa ned, mia kennan nur de foischn ;)